മുൻപിലുള്ള തടാകം മഞ്ഞുകട്ടയായി തണുത്തുറഞ്ഞു കിടക്കുകയാണ്. നീണ്ടു കിടക്കുന്ന ഹിമാലയത്തിന്റെ ഏതോ ഒരു കോണിൽ എത്തിയിരിക്കുന്നു. തണുപ്പ് അതി കഠിനമാണ്. സാധാരണയായി മൈനസ് ആണ് ഇവിടുത്തെ താപനില. കല്ലുപോലെ ഉറച്ച വെള്ളമാണ് തടാകത്തിൽ. മാനസ സരോവറിനേക്കാൾ എത്രയോ ഉയരത്തിലാണ് ഈ ഭംഗിയുള്ള തടാകം . ഇവിടെ നിന്നും അഞ്ചു കിലോമീറ്റർ വടക്കോട്ടു സഞ്ചരിച്ചാൽ ചൈനയിലെത്തും. ചൈനയോട് അത്ര അടുത്താണ്. എന്ന് കരുതി ഇത് വഴി ചൈനയിലേക്ക് പ്രവേശിക്കാനൊന്നുമാവില്ല. എം കെ രാമചന്ദ്രന്റെ ഉത്തരാഖണ്ഡിലുടെ കൈലാസ മാനസ സരോവർ യാത്ര വായിച്ചപ്പോൾ മനസ്സിൽ കയറിക്കൂടിയ മോഹമാണ് ഹിമാലയ യാത്രകൾ. വീണ്ടുമൊരിക്കൽ കൂടെ ഹിമാലയത്തിൽ എത്തിയിരിക്കുന്നു.
 |
Gurudongmar Lake Sikkim തീരത്തു അൽപ നേരം വിശ്രമം
|
ഗുരുദോംമർ(gurudongmar} തടാക കരയിൽ കുറച്ചു നേരമിരുന്നു. 17800 അടി ഉയരത്തിലാണ് തടാകം. കനത്ത തണുപ്പിൽ തടാകത്തിലെ വെള്ളം തണുത്തുറഞ്ഞാണ് കിടക്കുന്നത്. അതിനു ചുറ്റും മഞ്ഞു മൂടിയ ഹിമാലയ മല നിരകൾ ഉയർന്നു നിൽക്കുന്നു. നല്ല വെയിലുള്ള ദിവസമാണ്. തണുത്തുറഞ്ഞ തടാകം വെയില്കൊണ്ടു തിളങ്ങി നിൽക്കുന്നു. തടാകത്തിലേക്കുള്ള വഴിയിൽ 15000 അടി ഉയരത്തിലെത്തുമ്പോൾ അവിടെ ഒരു ആർമി ക്യാമ്പ് ഉണ്ട്. കൂട്ടത്തിൽ ഒരു കഫേ. പതിനയ്യായിരം അടി മുകളിൽ ഉള്ള ഒരു കഫേ "കഫേ 15000". ഇത്രയും ഉയരത്തിൽ എത്തുമ്പോളേക്കും അസാമാന്യ തണുപ്പാണ് അനുഭവപ്പെടുക. വഴിയിൽ മറ്റു കടകളൊന്നും ഇല്ലാതെ കുറെ ദൂരം യാത്ര ചെയ്താണ് ഇവിടെ എത്തുക. പട്ടാള ക്യാമ്പ് ആണിത്. ഈ കഫെയിൽ കയറി ചായയും കാപ്പിയുമൊക്കെ ഇഷ്ടം പോലെ കുടിച്ചു. പൈസ ഒന്നും കൊടുക്കണ്ട. സ്റ്റീൽ ഗ്ലാസിൽ നമുക്കാവശ്യത്തിനു ചായയും കാപ്പിയുമൊക്കെ എടുത്തു കുടിക്കാം. എന്തൊരു സുഖമായിരുന്നെന്നോ ഇത്രയും ഉയരത്തിൽ വന്നു ഒരു ഗ്ലാസ് ചൂട് കാപ്പി കുടിച്ചു കഴിഞ്ഞപ്പോൾ.
 |
പ്രായം തളർത്താത്ത യാത്രികർ
|
ഉയരം കൂടുതലായതിനാൽ ഓക്സിജൻ ഒക്കെ കുറവുള്ള സ്ഥലമാണ്. അവിടെ നിന്നും കാപ്പിയൊക്കെ കുടിച്ചാണ് തടാകക്കരയിലേക്കെത്തിയത്. വീണ്ടും മൂവായിരത്തോളം അടി മുകളിൽ എത്തണം. ഇതുവരെ കണ്ടിട്ടില്ലാത്ത ഹിമാലയൻ ഭൂപ്രകൃതി ആണ് ഇവിടെ. ആകെമൊത്തം ചന്ദ്രനിൽ എത്തിയ ഒരു അനുഭവമായിരുന്നു. മലയിടിഞ്ഞു കരിങ്കല്ലുകൾ മാത്രമുള്ള വലിയ താഴ്‌വാരം. ദൂരെ മഞ്ഞു മൂടിയ പർവ്വതനിരകൾ. കുറച്ചു കൂടി മുന്നോട്ടു എത്തിയപ്പോൾ പാറക്കല്ലുകൾക്കൊക്കെ ചുവന്ന നിറമായി. പർവ്വതങ്ങളിൽ നിന്ന് അടർന്നു വീണു അവ പരന്നു കിടക്കുന്ന കാഴ്ച ഒന്നു വേറെ തന്നെയാണ്. പർവ്വത മുകളിൽ ഇത്രയും ദൂരം പരന്നു കിടക്കുന്നതു ഒരു അത്ഭുത കാഴ്ച തന്നെയായിരുന്നു. പ്രകൃതി ശരിക്കും എന്നെ വിസ്മയിപ്പിച്ചു കളഞ്ഞു. ഇവിടെയൊന്നും ഒരു മരം പോലും കാണാനില്ല, എന്തിന് മഞ്ഞിൽ വളരുന്ന കുറ്റിച്ചെടികൾ പോലും ഇല്ല. തടാക തീരത്തെ പുൽനാമ്പുകൾ തണുപ്പിൽ കരിഞ്ഞുണങ്ങിയ പോലെയാണ് നില്ക്കുന്നത്.
 |
കല്ല് പോലെ ഉറച്ച തടാകം
|
തടാക തീരം വരെ നമുക്ക് വണ്ടിയിൽ എത്തിച്ചേരാം. തടാകതീരത്തുകൂടി കുറെ നടക്കാം. അമിത ആഹ്ലാദവും പ്രകൃതിയെ കീഴടക്കിയ അഹങ്കാരവും ആവേശവുമൊന്നുമില്ലാതെ വേണം. ശാന്തമായി സമാധാനമായി അതിന്റെ തീരത്തു അൽപനേരം ഇരിക്കാം. അമിതാവേശത്തോടുകൂടെ ഓടുകയും ചാടുകയുമൊന്നും വേണ്ട. ഓക്സിജൻ നന്നേ കുറവായതുകൊണ്ട് തല കറങ്ങി വീഴാം. പ്രായമായവരും ശ്വാസകോശ പ്രശ്നങ്ങൾ ഉള്ളവരും വാഹനത്തിൽ നിന്നിറങ്ങി താടകമൊന്നു കാണാം. അത്രയേ വേണ്ടൂ!!!
തടാകത്തിൽ നിന്നുത്ഭവിച്ചു തീസ്താ നദി താഴോട്ടൊഴുകി പോകുന്നു. തീസ്ത
നദിയുടെ പ്രധാന കൈ വഴി ആണ് ഗുരുദോംമറിൽ നിന്നൊഴുകുന്നത്. പശ്ചിമ ബംഗാളിൽ നിന്നും സിക്കിമിലേക്കു കയറിയാൽ പിന്നെ ഒട്ടു മിക്കപോളും ഈ നദി തീരത്തുകൂടെയാണ് സഞ്ചരിക്കുക. സിക്കിമിലെ ഏറ്റവും പ്രധാനപ്പെട്ട ഒരു നദി ആണ് തീസ്താ.
 |
തണുത്തുറഞ്ഞ തടാകക്കരയിൽ
|
യാത്ര തുടരും...
